មន្ត្រីនគរបាលនៅនាយកដ្ឋានធ្វើលិខិតឆ្លងដែន (ប៉ាស្ព័រ) បានបាញ់ទម្លុះរថយន្តរបស់ខ្លួន អស់១១គ្រាប់ ដោយសារខឹងម្ដាយទៅរករឿងដល់កន្លែងផឹកស៊ីនៅក្នុងហាងខារ៉ាអូខេយីហោ ពិភពរាត្រី
ភ្នំពេញ៖ កាលពីវេលាម៉ោងជាង១១យប់ ថ្ងៃទី១៦ ខែវិច្ឆិកា ឆ្នាំ២០១៨ បុរសម្នាក់ ដែលគេស្គាល់ច្បាស់ថា ជាមន្ត្រីនគរបាលនៅនាយកដ្ឋានធ្វើលិខិតឆ្លងដែន (ប៉ាស្ព័រ) បានបាញ់ទម្លុះរថយន្តរបស់ខ្លួន អស់១១គ្រាប់ ដោយសារខឹងម្ដាយទៅរករឿង ខណៈពេលខ្លួនកំពុងច្រៀងលេងកម្សាន្តសប្បាយនៅក្នុងហាងខារ៉ាអូខេយីហោ “ពិភពរាត្រី” ស្ថិតក្នុងភូមិសាស្ត្រសង្កាត់ទួលស្វាយព្រៃទី១ ខណ្ឌចំការមន រាជធានីភ្នំពេញ ។
មុនពេលកើតហេតុ មន្ត្រីនគរបាលជាជនបង្កបានបើករថយន្តម៉ាក ហាយឡែនឌ័រ ពណ៌កណ្ដុរប្រមេះ ពាក់ស្លាកលេខ ភ្នំពេញ 2D-3913 មកចូលច្រៀងខារ៉ាអូខេនៅហាង “ពិភពរាត្រី” ខាងលើ។ លុះមួយសន្ទុះក្រោយមក ស្រាប់តែលេចមុខម្ដាយ ដោយបានទៅរករឿងដល់កន្លែងតែម្ដង ធ្វើឲ្យមន្ត្រីនគរបាលរូបនោះ មានការខឹងសម្បារនឹងម្ដាយយ៉ាងខ្លាំង ព្រោះខ្លួនកំពុងរាំលេងសប្បាយជាមួយនាងៗ ហើយស្ទុះដើរចេញមកខាងក្រៅ រួចធ្វើសកម្មភាពដកកាំភ្លើងបាញ់សំដៅរថយន្តរបស់ខ្លួនអស់ចំនួន១១គ្រាប់ បណ្ដាលឲ្យធ្លុះកញ្ចក់រថយន្តផ្នែកខាងមុខ។ ដោយបង្កការបាញ់បោះរួច ជនបង្កមិនបាននៅកន្លែងកើតហេតុនោះទេ ពោល គឺទាំងម្ដាយ និងកូន បានដាក់មេប្រូចបាត់ស្រមោល ដោយបន្សល់ទុកតែរថយន្តនៅកន្លែងកើតហេតុ។ ចំណែកលោក យិន សាន្ត អធិការនគរបាលខណ្ឌចំការមន និងកម្លាំងនគរបាល ព្រមទាំងកម្លាំងអាវុធហត្ថ បានចុះមកកន្លែងកើតហេតុ ដើម្បីធ្វើការតាមជំនាញ។
ក្រោយពេលកើតហេតុភ្លាមៗ រថយន្តរងការបាញ់ប្រហារដោយគ្រាប់កាំភ្លើងរបស់មន្ត្រីនគរបាលរូបនោះ ត្រូវបានក្រុមសន្តិសុខរុញចេញទៅលាក់ទុកនៅចម្ងាយប្រហែល១០០ម៉ែត្រ ពីកន្លែងបាញ់នៅចំណុចមុខខារ៉ាអូខេ “ពិភពរាត្រី។ មន្ត្រីអាវុធហត្ថ បញ្ជាក់ថា នឹងធ្វើការស្រាវជ្រាវរកមន្ត្រីនគរបាល ដែលជាជនបង្កការបាញ់បោះនោះ យកមកដោះស្រាយតាមនីតិវិធីច្បាប់៕