ថ្ងៃព្រហស្បតិ៍ ទី២២ ខែមេសា ឆ្នាំ២០២១
គេហទំព័រ Friday Daily News ជឿជាក់ ច្បាស់លាស់ ឥតលំអៀង ... ផ្សព្វផ្សាយពាណិជ្ចកម្មទំនាក់ទំនងលេខ 088 5000 993 095 538 995
ពិភពលោកកំពុងបារម្ភណ៌ថា អាចនិងកើតសង្គ្រាម ទ្រង់ទ្រាយធំ ក្រោយពីអាមេរិក សម្លាប់មេទ័ពអ៊ីរ៉ង់
Mo,06 Januar 2020 (Time 08:00 )
ដោយ ៖ Friday Daily News (ចំនួនអ្នកអាន: 1006នាក់)


បរទេស÷ ក្រោយការវាយប្រហារសម្លាប់ មេទ័ពអ៊ីរ៉ង់ នៅលើទឹកដីអ៊ីរ៉ាក់, អ៊ីរ៉ង់ក៏បានប្រកាសសងសឹកអាមេរិកវិញ​ ។ សកម្មភាពទាំងនេះ បានធ្វើឲ្យមេដឹកនាំបណ្តាប្រទេស នៅក្នុងតំបន់អឺរ៉ុប ​បង្ហាញក្តីព្រួយបារម្ភយ៉ាងខ្លាំងអំពីការផ្ទុះសង្គ្រាមទ្រង់ទ្រាយធំកើតឡើង នៅតំបន់មជ្ឈិបូព៌ា ​រវាងអាមេរិក នឹង អ៊ីរ៉ង់ ដោយបានអំពាវនាវឲ្យភាគីទាំងពីរ​រក្សាការអត់ធ្មត់​។

កាលពីរសៀល ថ្ងៃទី​៣ ខែធ្នូ ប្រធានាធិបតីបារំាង​ លោក​ ម៉ាក្រុង បានជួបពិភាក្សាតាមទូរស័ព្ទជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ស្តីអំពីស្ថានការណ៍ នៅក្នុងតំបន់។ បារាំង និងរុស្ស៊ី បានបញ្ជាក់ថា សកម្មភាពរបស់អាមេរិក អាចនឹងធ្វើឲ្យស្ថានការណ៍ នៅក្នុងតំបន់ កាន់តែតានតឹងឡើង រហូតឈានដល់ការផ្ទុះសង្គ្រាមទ្រង់ទ្រាយធំ។ ជាមួយគ្នាដែរ មេដឹកនាំទាំង២ ​ក៏បានអំពាវនាវឲ្យភាគីអ៊ីរ៉ង់ រក្សាការអត់ធ្មត់​ កុំបញ្ចេញសកម្មភាព​វាយបកសងសឹកទៅលើអាមេរិក ព្រោះវាអាចធ្វើឲ្យសង្គ្រាមផ្ទុះឡើង។

ជាមួយគ្នានេះដែរ រដ្ឋមន្ត្រីការបរទេសបារាំង Jean-Yves Le Drian បានជួបពិភាក្សាតាមទូរស័ព្ទជាមួយរដ្ឋមន្ត្រីការបរទេសអាមេរិក ដោយស្នើដល់អាមេរិក បញ្ចៀសសកម្មភាព បង្កឲ្យមានសង្គ្រាម។​ ចំណែកភាគីអ៊ីរ៉ាក់វិញ បានខឹងសម្បានឹង​អាមេរិកយ៉ាង​ខ្លាំង ព្រោះតែការវាយប្រហារនេះ បានសម្លាប់មេទ័ពអ៊ីរ៉ង់ នៅលើទឹកដីរបស់ខ្លួន។ រដ្ឋាភិបាលអ៊ីរ៉ាក់ បានព្រមានថា ខ្លួននឹងបញ្ចប់កិច្ចសហការសន្តិសុខជាមួយអាមេរិក ប្រសិនបើអាមេរិកនៅតែមានសកម្មភាព វាយប្រហារបែបនេះបន្ដទៀត។

ក្រៅពីនេះ​ អាល្លឺម៉ង់ អង់គ្លេស​…និងបណ្ដាប្រទេសជាច្រើនទៀត ក៏បានអំពាវនាវដល់អាមេរិក ត្រូវតែរក្សាការអត់ធ្មត់ បញ្ចៀសសង្គ្រាម កុំឲ្យកើតឡើងជាទ្រង់ទ្រាយធំ នៅក្នុងតំបន់ ព្រោះវាអាចរាលដាល បង្កឲ្យមានវិបត្តិជនភៀសខ្លួន កាន់តែច្រើនឡើង ។

ភាគីអាមេរិក បានបញ្ជាក់ថា ការវាយប្រហារតាមដែនអាកាសសម្លាប់មេទ័ពអ៊ីរ៉ង់ នេះ គឺដើម្បី​ទប់ស្កាត់សង្គ្រាមកើតឡើង នាពេលអនាគត។ មេទ័ពអ៊ីរ៉ង់គួរតែត្រូវបានសម្លាប់ជាយូរណាស់មកហើយ មិនមែនទើបតែត្រូវបានសម្លាប់ពេលនេះទេ​។

សារព័ត៌មាន​ BBC News ​បានផ្សាយថា ការវាយប្រហារតាមដែនអាកាស បានសម្លាប់មេទ័ពអ៊ីរ៉ង់ និង មន្ត្រី​ជំនិត​៩នាក់ផ្សេងទៀត បានបង្ហាញយ៉ាងច្បាស់ថា ក្រុមចារកិច្ចអាមេរិក ពិតជាបានតាមដានរាល់សកម្មភាព​​របស់មន្ត្រីជាន់ខ្ពស់អ៊ីរ៉ង់ ។

អ្នកឯទេសវិភាគ លោក Jonathan Marcus បានបញ្ជក់ថា​ អ៊ីរ៉ង់មិនអាចរក្សាការអត់ធ្មត់ ហើយមិនវាយបកអាមេរិកនោះឡើយ តែការវាយបករបស់អ៊ីរ៉ង់ មិនមែនជាពេលនេះ។ កម្លាំងទាហានអាមេរិក​៥ពាន់នាក់ នៅលើទឹកដីអ៊ីរ៉ាក់​ គឺជាគោលដៅ​វាយប្រហារ​របស់​កម្លាំងទាហានអ៊ីរ៉ង់។ ក្រៅពីនេះ នៅមានទីតាំងជាច្រើនទៀត នឹងត្រូវអ៊ីរ៉ង់ ឬក្រុមជិតស្និទ្ធអ៊ីរ៉ង់វាយប្រហារជាមិនខាន ។

ការតែងតាំង​ឧត្តមសេនីយ៍ត្រី​ Esmail Qaani អាយុ​៦៣ឆ្នាំ ជំនួសតំណែងលោក​ Soleimani ​ភ្លាមៗ គឺជាការត្រៀមលក្ខណៈវាយបកទៅលើអាមេរិក​។ លោក​ Esmail Qaani ជាមេទ័ពដែលបានថ្កោលទោសអាមេរិក ហើយ​បានចោទប្រកាន់អាមេរិក ដោយផ្ទាល់ថា​ ជាអ្នកបង្កើតឲ្យមានព្រឹត្តិការណ៍វាយប្រហារ ថ្ងៃទី​១១ ខែកញ្ញា ឆ្នាំ​២០០១ ​ដើម្បីបង្កសង្គ្រាម នៅក្នុងតំបន់មជ្ឈិមបូព៌ា។

នៅពេលនេះ បណ្តារដ្ឋអាមេរិក នឹងទីក្រុង ទាំងអស់បានបង្កើនសន្តិសុខការពារ ទប់ស្កាត់ការវាយប្រហារភេរវកម្ម ទៅលើពលរដ្ឋអាមេរិកជាការសងសឹកដល់ការស្លាប់របស់មេទ័ពអ៊ីរ៉ង់។ ពលរដ្ឋអ៊ីរ៉ង់នៅគ្រប់ទិសទី​ បាននាំគ្នាធ្វើបាតុកម្មប្រឆាំងនឹងអាមេរិក ធ្វើឲ្យស្ថានការណ៍កាន់តែតានតឹង។

ក្រុមអ្នកឯកទេសវិភាគ បានលើកឡើងថា ប្រសិនបើប្រទេសទាំងពីរ មិនរក្សាការអត់ធ្មត់ឲ្យបានល្អទេនោះ ​សង្គ្រាមទ្រង់ទ្រាយធំនឹងកើតឡើងជាមិនខាន អាចក្លាយទៅជាសង្គ្រាមលោកលើកទីបី ។ កន្លងមក អ្នកជំនាញបានលើកឡើងថា សង្គ្រាមលោក អាចកើតចេញពីតំបន់ មជ្ឈិមបូព៌ា​ រវាងអាមេរិក និងអ៊ីរ៉ង់ ឬសង្គ្រាមជាមួយកូរ៉េខាងជើង​។​ នៅពេលនេះសង្គ្រាមកំពុងតែកកើតជារូបរាងហើយ ក្រោយអាមេរិកសម្លាប់មេទ័ពអ៊ីរ៉ង់​។ ​ប្រទេសអ៊ីស្លាមមួយនេះ នឹងមិនទុកឲ្យអាមេរិកបានសុខនោះឡើយ​។

ក្រោយសម្លាប់មេទ័ពកំពូលរបស់អ៊ីរ៉ង់រួច អាមេរិកបានបញ្ជូនកងទ័ពជាង៣៥០០នាក់បន្ថែមទៀត ទៅកាន់តំបន់មជ្ឈិមបូព៌ា និងបញ្ជាឲ្យប្រជាពលរដ្ឋរបស់ខ្លួន នៅក្នុងប្រទេសអ៊ីរ៉ាក់ ត្រូវចាកចេញជាបន្ទាន់ ហើយពលរដ្ឋអាមេរិកាំង នៅជិតប្រទេសនេះ ក៏ត្រូវមានការប្រយុងប្រយ័ត្នខ្ពស់។

លោក ដូណាល់ ត្រាំ ប្រធានាធិបតីអាមេរិក បានចាត់ទុក​មេទ័ពកំពូលរបស់អ៊ីរ៉ង់ Qasem Soleimani ជាអ្នកគាំទ្រអំពើភេរវកម្ម។ មេទ័ពអ៊ីរ៉ង់រូបនេះ ក៏ជាអ្នករៀបចំគម្រោងវាយប្រហារទៅលើអាមេរិកផងដែរ។ ដូច្នេះការសម្លាប់មេទ័ពកំពូលអ៊ីរ៉ង់ខាងលើ​ និងមនុស្សជំនិតរបស់គាត់ចំនួន៩នាក់ផ្សេងទៀត គឺជាការបញ្ចប់អំពើភេរវកម្ម វាយប្រហារមកលើអាមេរិក។

លោកប្រធានាធិបតីអាមេររិក បានបញ្ជាក់ថា ការវាយប្រហារតាមអាកាស កំណត់គោលដៅសម្លាប់មេដឹកនាំកំពូលអ៊ីរ៉ង់ឈ្មោះ Qassem Suleimani នៅក្នុងទីក្រុងបាដាដ ប្រទេសអ៊ីរ៉ាក់​នេះ គឺទីក្រុងវ៉ាស៊ីនតោន ចង់បញ្ចប់មហិច្ឆតាសង្រ្គាមរបស់ មេទ័ពអ៊ីរ៉ង់។

លោកប្រធានាធិបតីអាមេរិក បាននិយាយ នៅក្នុងសេចក្ដីថ្លែងការណ៍ នៅឯរដ្ឋផ្លរីដា ថា​ មេដឹកនាំកម្លាំងឆ្មាំបដិវត្ដអ៊ិស្លាម រូបនេះ មិនមែនជាមនុស្សមានតម្លៃ សម្រាប់ធ្វើឲ្យពលរដ្ឋស្លូតត្រង់ស្លាប់ ដើម្បីបំពេញមហិច្ឆតារបស់គាត់ឡើង។

មន្រ្ដីអ៊ីរ៉ាក់ បានថ្លែងថា លោក Suleimani មេបញ្ជាការកងកម្លាំង Quds​ របស់ឆ្មាំបដិវត្តន៍អ៊ិស្លាម និងលោក Abu Mahdi Al Muhandis មេបញ្ជាការរង នៃកងជីវពលអ៊ីរ៉ាក់ គាំទ្រដោយអ៊ីរ៉ង់ ដែលគេស្លាល់ថា កងកម្លាំងចល័តប្រជាប្រិយ (PMF) ស្ថិតក្នុងចំណោមមនុស្សជាង១០នាក់ ត្រូវបានសម្លាប់ នៅជិតអាកាសយានដ្ឋានអន្ដរជាតិទីក្រុងបាដាដ កាលពីថ្ងៃទី៣ ខែមករា ៕

ចំនួនអ្នកទស្សនា

ថ្ងៃនេះ :
560 នាក់
ម្សិលមិញ :
891 នាក់
សប្តាហ៍នេះ :
10464 នាក់
ខែនេះ :
33285 នាក់
3 ខែនេះ :
79298 នាក់
សរុប :
703028 នាក់