ខេត្តកំពង់ចាម៖ មានសេចក្តីរាយការណ៍មកថា ចាប់តាំងពីលោក ប្រាក់ សុគន្ធ មកទទួលតំណែងជាអធិការស្រុកជើងព្រៃគេសង្កេតឃើញថា ល្បែងសុីសងគ្រប់ប្រភេទកើតមានយ៉ាងពេញបន្ទុក។ ក្នុងនោះគេក៏សង្កេតឃើញផងដែរថា លោកអធិការរូបនេះអសកម្មក្នុងការបង្រ្កាបល្បែងសុីសង ហាក់បីដូចជាកំពុងរក្សារល្បែងសុីសងទាំងនោះ ដើម្បីចាំប្រមូលផលប្រយោជន៍ប្រចាំខែ។ តាមប្រភពបានប្រាប់ថា ទីតាំងល្បែងស៊ីសងខុសច្បាប់ដុះស្លែរមួយនេះ ស្ថិតនៅក្នុងភូមិ ត្រពាំងឫស្សី ឃុំសំរោង ស្រុកជើងព្រៃ ខេត្តកំពង់ចាម ។ បើយោងតាមប្រភពព័ត៌មានបាននិយាយតៗគ្នាពីមាត់មួយទៅមាត់មួយតាមតុកាហ្វេ បានឲ្យដឹងថា លោក គីម ពៅហុង អធិការរង នឹងឈ្មោះ គ្រី ជាមន្ត្រីប៉ូលីសសេដ្ឋកិច្ចខេត្តកំពង់ចាម ក៏មានភាគហ៊ុនជាមួយលោក ហេង ម្ចាស់ទីតាំងសង្វៀមាន់ បៀ និង អាប៉ោង នេះផងដែរ ទើបធ្វើអោយលោកអធិការមិនហ៊ានបង្ក្រាប ។ តាមប្រភពបន្តថា ទីតាំងល្បែងសុីសង ជល់មាន់ បៀ និង អាប៉ោងនេះ បានបើកលេងជារៀងរាល់ថ្ងៃ ដោយភ្នាល់លុយខ្ទង់លានៗ ដោយមានអ្នកចាញ់ និងអ្នកឈ្នះហើយថែមទាំងហូរកញ្ចៀវ យ៉ាងសប្បាយរីករាយ មិនដែលឃើញសមត្ថកិច្ចណាម្នាក់ហ៊ានចេញមុខទៅបង្រ្កាបឡើយ។ក្នុងនេះផងដែរដោយសារតែភាពអសកម្មរបស់សមត្ថកិច្ចក្នុងស្រុកជើងព្រៃមិនឃើញទៅបង្រ្កាបទីតាំងជល់មាន់របស់លោក ហេង បែបនេះហើយ បានធ្វើឲ្យមហាជនរិះគន់ថា លោក ប្រាក់ សុគន្ធ អធិការស្រុកជើងព្រៃ អាចនិងមានជាប់ពាក់ព័ន្ធទទួលលាភសក្ការ:ពីក្រុមល្បែងមួយនេះ ទើបមិនបង្រ្កាបយ៉ាងដូច្នេះ។មហាជនលើកឡើងបន្តទៀតថា ល្មមដល់ពេល ឯកឧត្ដម អ៊ុន ចាន់ដា អភិបាលខេត្តកំពង់ចាម និង លោក ឯម កុសល ស្នងការខេត្តកំពង់ចាម បញ្ចេញស្នាដៃដោយផ្ទាល់បង្រ្កាបទីតាំងសង្វៀនមាន់ បៀ និង អាប៉ោង របស់លោក ហេង ហៅ ព្រៃ នេះហើយ ដើម្បីគោរពតាមបទបញ្ជារបស់សម្តេចតេជោ ហ៊ុន សែន និង អនុវត្តឲ្យបានត្រឹមត្រូវតាមគោលនយោបាយទាំង៩ចំនុចដើម្បីភូមិ/ឃុំ មានសុវត្ថិភាព របស់រាជរដ្ឋាភិបាល៕
ចំនួនអ្នកទស្សនា