ខេត្តស្វាយរៀង ៖ មានរថយន្តយីឌុបជាច្រើនគ្រឿង ដឹកទំនិញគេចពន្ធជាច្រើនប្រភេទ ត្រូវបានឈ្មួញលួចដឹកឆ្លងដែនទៅប្រទេសវៀតណាមតាមច្រករបៀងនៃច្រកទ្វារព្រំដែនទួលស្ដី ស្ថិតនៅភូមិកោះឬស្សី ឃុំទួលស្ដី ស្រុកចន្រ្ទា ហើយមហាជនដាក់ការសង្ស័យថា សមត្ថកិច្ចពាក់ព័ន្ធទទួលបានសំណែន ទើបគ្មានការបង្ក្រាបបែបនេះ។ការបែកធ្លាយខាងលើនេះ បានកើតឡើងនៅរសៀលថ្ងៃទី២៥ ខែតុកា ឆ្នាំ២០២៣ ដោយមហាជនរាយការណ៍ជូនអ្នកសារព័ត៌មានយើង។បើតាមប្រភពពីមន្ត្រីច្រកទ្វារព្រំដែនទួលស្ដីម្នាក់ សុំមិនបញ្ចេញឈ្មោះ បានបង្ហើបឲ្យដឹងថា ករណីក្រុមឈ្មួញលួចដឹកទំនិញគេចពន្ធឆ្លងដែនទៅប្រទេសវៀតណាមខុសច្បាប់នេះ មានរយៈពេលជាយួរមកហើយ គឺក្រុមឈ្មួញបានដឹកទំនិញតាមរថយន្តយីឌុបដែលមានស្លាកយីហោ(Kដឹកជញ្ជួន2023) ចេញពេលថ្ងៃ និង ពេលយប់ ហើយក៏មិនបានដឹងថាបង់ពន្ធរួច ឬក៏សង្ស័យថាទំនិញគេចពន្ធដែលទាំងនោះ រួមមាន ៖ គ្រឿងអេឡេចត្រូនិច (ម៉ាស៊ីនត្រជាក់ ទូទឹកកក), ស្រាដប, បារី, ស្ករ.ស ។ចំណែកកម្មករលើកទំនិញម្នាក់ ក៏បានឲ្យដឹងទៀតថា យប់ខ្លះក៏មានបង្កប់ឈើប្រណីតឆ្លងដែនទៅប្រទេសវៀតណាមដែរ ។ ប្រភពបានបង្ហើបទៀតថា ពេលផ្ទេរទំនិញឆ្លងដែន គឺពួកគេឃើញមានមន្ត្រីមានសមត្ថកិច្ចជាច្រើនស្ថាប័ន បានទៅយកប្រាក់ក្បាលរថយន្តពីឈ្មួញ។ទាក់ទិនករណីខាងលើនេះដែរ មិនអាចរកការបំភ្លឺពីស្ថាបន័ពាក់ព័ន្ធបានទេ ដោយទូរស័ព្ទចូលគឺគ្មានអ្នកទទួល ចំណែកអ្នកទទួលបានឆ្លើយថា សូមសួរទៅស្ថាប័នជំនាញទៅ។ពលរដ្ឋក៏ ស្នើរសុំដល់លោក ស្នងការខេត្តស្វាយរៀង និង ឯកឧត្តម ប៉េង ពោធិ៍សា អភិបាលខេត្តស្វាយរៀង មេត្តា ជួយចាត់មន្រ្តីជំនាញអោយចុះ តាមដានក្រុមឈ្មួញ ដែលលួចដឹកទំនិញចេញតាម ច្រករបៀងទួលស្ដី ស្រុកចន្រ្ទានេះផង មានដាក់ការសង្ស័យក្រែងមិនបានបង់ពន្ធ នាំអោយបាត់ចំណូលចូលរដ្ឋ៕
ចំនួនអ្នកទស្សនា