កំពត: បន្ទាប់ពីប្អូនស្រី សៀង ស្រីអូន បានទទូលមរណៈភាពក្រោមការធ្វេសប្រហែល របស់គ្រូពេទ្យគ្មានវិជ្ជាជីវៈ នៅមន្ទីសម្រាកព្យាបាល និងសម្ភពដើមអង្គ្រង(ព្រៃទទឹង) លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានទៅគោរពវិញ្ញាណក្ខន្ធ និងចូលរួមរំលែកទុក្ខដល់គេហដ្ឋានសព ព្រមទាំងនាំយកនូវថវិកាមួយចំនួន និងពាំនាំនូវការចូលរួមរំលែកទុក្ខ និងការចូលរួមសោកស្តាយជាពន់ពេកពីសំណាក់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល និងថ្នាក់ដឹកនាំ នៃក្រសួងសុខាភិបាល ជូនដល់ក្រុមគ្រូសារនៃសព នៅថ្ងៃព្រហស្បតិ៍ ទី១៦ ខែមីនា ឆ្នាំ២០២៣ នៅភូមិពងទឹក ឃុំស្រែចែង ស្រុកជុំគីរី ខេត្តកំពត។

សៀង ស្រីអូន បានចូលមកសម្រាកនៅមន្ទីសម្រាកព្យាបាល និងសម្ភពដើមអង្គ្រង(ព្រៃទទឹង)នៅថ្ងៃទី១០ ខែវិច្ឆិកា ឆ្នាំ២០២២ ដោយនាងមានបំណងយកសពកូន០៤ខែនៅក្នុងផ្ទៃរបស់នាង តែគ្រូពេទ្យគ្មានវីជ្ជាជីវៈបានកាត់ដាច់ដៃស្បួន និងពោះវៀនរបស់នាង ដែលជាហេតុបណ្តាលអោយនាងធ្លាក់ខ្លួនឈឺ និងទៅព្យាបាល ទាំងក្នុងនិងក្រៅប្រទេស ព្រមទាំងទទូលបានការយកចិត្តទុកដាក់ខ្ពស់ពីសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ កម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយសម្តេចទាំងទ្វេរ បានឧបត្ថម្ភ និងចំណាយលើថ្លៃព្យាបាលទាំងអស់
មិនត្រឹមតែប៉ុណ្ណឹងទេ ក៏មានសប្បុរសជនជាច្រើនរូបទៀត បានចូលរួមឧបត្ថម្ភផងដែរ។


សូមបញ្ជាក់ថា ប្អូនស្រីអូន បានទទូលមរណៈភាពនៅវេលាម៉ោង០៣ ជិតភ្លឺ នៅថ្ងៃទី ១៦​ មីនា​ ២០២៣​ នៅមន្ទីពេទ្យកាលម៉ែត​ ចំពោះដំណឹងនេះ អង្គភាពសារព័ត៌មាន ហ្វ្រាយដេ ដេលីញូស៍យើងខ្ញុំ ពិតជាសោកស្តាយ និងសូមគោរពវិញ្ញាណក្ខន្ធប្អូនស្រីសៀង ស្រីអូន បានទៅកាន់សុខគតិភព កុំបីឃ្លៀងឃ្លាតឡើយ។