បាត់ដំបង: នាវេលាម៉ោ៦ព្រឹក នៅថ្ងៃទី២០ ខែកញ្ញា ឆ្នាំ២០២៣នេះ ស្ថិតក្នុងភូមិសំរោង ឃុំធិបតី ស្រុកគាស់ក្រឡ មានម៉ូតូមួយគ្រឿងមាក់ Honda កម្លាំង១២៥ cc ឆ្នាំ២០១៧ ព័ណ៌ខ្មៅ ស្លាកលេខ ១x-៩៥២៣ បានទុកចោលក្នុងព្រៃមួយយប់ មិនដឹងមូលហេតុ។

ក្រោយទទូលដំណឹងពីប្រជាពលរដ្ឋភ្លាម លោកអនុសេនីយ៍ឯក ថន ប៊ុនធី នាយប៉ុស្តិ៍នគរបាលរដ្ឋបាលឃុំធិបតី បានមកដល់ទីតាំងភ្លាមៗតែម្តង នឹងធ្វើការត្រួតពិនិត្យទីតាំង និងវត្ថុតាង ព្រមទាំងសំណូមពរប្រជាពលរដ្ឋនៅកន្លែងកើតហេតុជួយលើក និងរុញម៉ូតូនោះយកមកខាងលើ ដើម្បីពិនិត្យបន្ថែម ក៏ប្រទះឃើញ កាបូបលុយមួយ ក្នុងនោះមានលុយមួយចំនួន កាតការងារ និងអត្តសញ្ញាណប័ណ្ឌជនរងគ្រោះ តែមិនឃើញជនរងគ្រោះ ក៏សង្ស័យថា ជនរងគ្រោះអាចដួលម៉ូតូហើយ ផ្លោងចូលក្នុងប្រឡាយទឹក ព្រោះសង្កេតឃើញថា ម៉ូតូមួយគ្រឿងនោះ នៅមានសោរជាប់នឹងម៉ូតូនៅឡើយ ក៏ប្រជាជនបាននាំគ្នាចុះរាវក្នុងទឹក តែមិនជួបជនរងគ្រោះឡើយ។


តាមប្រភពប្រជាពលរដ្ឋនៅកន្លែងកើតហេតុថា កាលពីម៉ោងប្រមាណ២:០០នាទីព្រឹក នាថ្ងៃខែឆ្នាំដដែលនោះ គឺមានសំឡេងឆ្កែព្រួសខ្លាំង ក៏ប្រជាពលរដ្ឋខ្លះបានចេញមកមើលស្ថានភាព ខាងក្រៅ តែពុំប្រទះឃើញអ្វីប្លែកឡើយ។

លុះម៉ោងប្រហែល៦:៣០នាទីព្រឹក ស្រាប់តែជនរងគ្រោះបានមកដល់ទីតាំងកើតហេតុ នឹងបានរៀបរាប់ពីហេតុការថា យប់មិញខ្លួនជិះម៉ូតូពីរនាក់មិត្តភក្តិ ដោយដាក់ជ្រុល ក៏ដួលម៉ូតូតែម្តង អំឡុងពេលដួលនោះខ្លួនបំរុងលើកម៉ូតូ តែមិត្តភក្តិថា មិនបាច់លើកទេ ដោយខ្លួនចិត្តដែរ ក៏សម្រេចចិត្តដើរទៅផ្ទះ។

ក្រោយពិនិត្យថា ម៉ូតូនោះជារបស់ជនរងគ្រោះពិតប្រាកដមែន លោកអនុសេនីយ៍ឯក ថន ប៊ុនធី នាយប៉ុស្តិ៍នគរបាលរដ្ឋបាលឃុំធិបតី ក៏បានអប់រំជនរងគ្រោះថា បើស្រវឹង សូមកុំបើកបរ នឹងបានប្រគល់ម៉ូតូជនរងគ្រោះយកត្រឡប់ទៅផ្ទះវិញ។