រាជធានីភ្នំពេញ: ថ្ងៃទី២៧ ខែកញ្ញាឆ្នាំ២០២៣នេះ ក្រសួងសេដ្ឋកិច្ច និង ហិរញ្ញវត្ថុ អគ្គនាយកដ្ឋានពន្ធដារបានសេចក្តីជូនដំណឹងស្តីពីការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) ចំពោះពន្ធលើអចលនទព្យ និង/ឬពន្ធលើដីធ្លីមិនបានប្រើប្រាស់។

ក្នុងសេចក្តីជូនដំណឹងនេះ គឺបានការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) ចំពោះពន្ធលើអចលនទព្យ និង/ឬពន្ធលើដីធ្លីមិនបានប្រើប្រាស់ រហូតដល់ដំណាច់ឆ្នាំ២០២៣ ប៉ុន្តែមិនមានអនុភាពចំពោះការបានបង់រួចនោះទេ ផ្ទុយទៅវិញចាប់ពីឆ្នាំ២០២៤ តទៅ ក្នុងករណី ម្ចាស់អចលនទ្រព្យ មិនបានបំពេញកាតព្វកិច្ចពន្ធទាំងពីរនេះនឹងត្រូវអនុវត្តតាមច្បាប់ និងលិខិតបទដ្ឋានគតិយុត្តជាធរមាន។

ដោយជាក់ស្តែងក្នុងពេលបច្ចុប្បន្ននេះ បញ្ហាពន្ធជាប្រធានបទក្តៅ បានធ្វើអោយមានការផ្ទុះរិះគន់យ៉ាងកក្រើកខ្លាំងក្នុងប្រទេសកម្ពុជា រហូតដល់សម្តេចបវរមហាធិបតី ហ៊ុន ម៉ាណែត នាយករដ្ឋមន្រ្តីបានផ្ញើរសារសំឡេងក្នុងបណ្តាញសង្គមតេឡេក្រាមរបស់សម្តេចជូនសមាជិក រាជរដ្ឋាភិបាល ពាក់ព័ន្ធករណីពន្ធដារ៖ មិនទាន់មានការសម្រេចជាផ្លូវការរបស់រាជរដ្ឋាភិបាល ក្នុងការប្រមូលពន្ធចំណេញមូលធននៅដើមឆ្នាំ២០២៤ ហើយរាជរដ្ឋាភិបាលថ្មីក៏មិនមានបង្កើតពន្ធថ្មីណាមួយ ដើម្បីដាក់បន្ទុកលើប្រជាពលរដ្ឋនោះទេ។


អញ្ជឹងយើងងាកមកមើលសេចក្តីជូនដំណឹងខាងលើ អគ្គនាយកដ្ឋានពន្ធដារបានជូនលេខសម្រាប់ទំនាក់ទំនងCall Center) តាមរយៈលេខទូរស័ព្ទ ១២៧៧ ដោយឥតគិតថ្លៃ រៀងរាល់ម៉ោងធ្វើការ ឬកម្មវិធីជជែកផ្ទាល់ជាមួយពន្ធដារ GDT Live Chat ព្រមទាំងសង្ឃឹមយ៉ាងមុតមាំថា បន្ទាប់ពីទទួលបានសេចក្ដីជូនដំណឹងនេះ ម្ចាស់អចលនទ្រព្យ ទាំងអស់ពិតជានឹងយកចិត្តទុកដាក់ និងអញ្ជើញមកបំពេញកាតព្វកិច្ចសារពើពន្ធឱ្យបានទាន់ពេលវេលាកំណត់ខាងលើ ជាពុំខាន។