ខេត្តបន្ទាយមានជ័យ ÷ បន្ទាប់ពីអង្គភាពសារព័ត៌មាន យើង បានធ្វើការចុះផ្សាយចំនួនពីរលេខ ពីទីតាំង សាងសង់ សំណង់ខុសច្បាប់រំលោភលើដីចំណីផ្លូវ របស់លោក គួច ម៉េង ម្ចាស់នាគទិព្វ២ ខណៈពេលនេះ រដ្ឋបាលក្រុងប៉ោយប៉ែត ដឹកនាំដោយលោក បោន សិលា អភិបាលរងក្រុងប៉ោយប៉ែត បានចុះហាមឃាត់សំណង់រំលោភលើដីចំណីផ្លូវនេះហើយ នាព្រឹកថ្ងៃ ១៦ ខែតុលា ឆ្នាំ២០២៤ នៅតាមបណ្តោយផ្លូវបេតុង ស្តង់តាងួន ឋិតក្នុងភូមិ គីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។

បើយោង តាមលិខិតកំណត់ហេតុរបស់រដ្ឋបាលក្រុងប៉ោយប៉ែត បានឲ្យដឹងថា ការសាងសង់សំណង់របស់លោក គួច ម៉េង គឺបានរំលោភលើដីចំណីផ្លូវមានទំហំ ៤.៥សង់ទី ម៉ែត្រ ×៣០.៤ សង់ទីម៉ែត្រ និង មានកំពស់ ៤ម៉ែត្រ ។ ក្នុងនោះ ក្រុមការងាររបស់រដ្ឋបាលក្រុងប៉ោយប៉ែត បានណែនាំអោយឈ្មោះ យ៉ែម សុភាព តំណាងម្ចាស់សំណង់ រុះរើសំណង់ ដែលបាន សាងសង់រំលោភលើដី សាធារណៈ ទុកធ្វើជាផ្លូវថ្មើរជើង វិញ ។ ក្នុងកំណត់ហេតុរបស់រដ្ឋបាលក្រុង បានបញ្ជាក់ឲ្យដឹងទៀតថា ឈ្មោះ យ៉ែម សុភាព តំណាងម្ចាស់សំណង់ បានឯកភាព តាមការណែនាំរបស់ក្រុមការងារ ៕


មហាជន អបអរសាទរ និង ថ្លែងអំណរគុណ ដល់រដ្ឋបាលក្រុងប៉ោយប៉ែត ដែលបាន ចុះទប់ស្កាត់ ហាមឃាត់ សំណង់ខុសច្បាប់រំលោភលើដីចំណីផ្លូវសាធារណៈរបស់ម្ចាស់នាគទិព្វ២ ប្រកបដោយ តម្លាភាព ដូចពលរដ្ឋទូទៅ ។ មហាជន បានលើកឡើងទៀតថា សង្ឃឹម រដ្ឋបាលក្រុងប៉ោយប៉ែត និង ចុះហាមឃាត់ឃាត់ ក៏ដូចជា រុះរើ សំណង់នានាផ្សេងទៀត ដែលសាងសង់ លើដីចំណីផ្លូវ ដែលពួកគាត់ នៅមិនទាន់បានចូលរួមជាមួយ អាជ្ញាធរ ក្នុងការរុះរើ ឬ កាត់សំយ៉ាប ដើម្បីរបៀបរបប និង សោភ័ណភាព ក្រុងប៉ោយប៉ែត ជាបន្តទៀត ។

"យើងចូលរួមជាមួយអាជ្ញាធរ ដើម្បី ទីក្រុងយើងស្អាត ក្លាយជាទីក្រុង គួរអោយចង់រស់នៅ" ៕