ខេត្ត​ស្វាយរៀង៖ ប្រជាពលរដ្ឋ និងអាជីវករ នៅចំណតទូកប្រឡាយទាហានប្រមាណជាង ៣០០នាក់ក្នុងភូមិព្រៃវល្លិ៍​ បានបន្តស្នើសុំអាជ្ញាធរគ្រប់លំដាប់ថ្នាក់ និងរាជរដ្ឋាភិបាល ចរចាបើកច្រកទ្វារព្រំដែនផ្លូវទឹកប្រឡាយទាហាន ​​(ខេត្តស្វាយរៀង) - បេនហ៊ីប(ខេត្តឡុងអាន) បន្ទាប់ពីមានការបិទអស់រយៈពេលជាង៦ខែកន្លងមកនេះ។

ករណីនេះបានបន្តកើតឡើង នៅព្រឹកថ្ងៃទី២៨ ខែតុលា ឆ្នាំ២០២៤ នៅចំណតកាណូតប្រឡាយទាហានស្លាបច្រកទ្វារព្រំដែនអន្តរជាតិព្រៃវល្លិ៍ ស្ថិតនៅភូមិព្រៃវល្លិ៍ឃុំថ្មី ស្រុកកំពង់រោទ៍ ខេត្តស្វាយរៀង។

បើតាមប្រជាពលរដ្ឋ បានលើកឡើងថា ​ពួកគាត់បានបន្តស្នើសុំយ៉ាងឲ្យអាជ្ញាធរមានសមត្ថកិច្ច ជាពិសេសសម្តេច​ធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ជួយពិនិត្យចរចាបើកច្រកព្រំដែនផ្លូវទឹក នៃច្រកទ្វារព្រំដែនអន្តរជាតិព្រៃវល្លិ៍ឡើងវិញ ខណៈច្រកទ្វារព្រំដែនផ្លូវទឹកមានតែមួយគត់ ក្នុងខេត្តស្វាយរៀង ដែលអាជីវករខ្មែរបានបង្កើតចំណតទូកកាណូត នាំទំនិញ និងកសិផល(ស្រូវ)ចេញទៅប្រទេសវៀតណាមជាពិសេស ផលិតផលស្រូវ ដែលអាជីវករបានដើរប្រមូលទិញពីបណ្តាខេត្តនានាទូទាំងប្រទេស នាំចេញទៅប្រទេសវៀតណាម។

ប្រភពខាងលើនេះ បានបញ្ជាក់ថា បន្ទាប់ពីមានការបិទច្រកព្រំដែនផ្លូវទឹកនេះ​អស់រយៈពេលជាង៦ខែមកហើយ និងបង្កផលប៉ះពាល់ដល់អាជីវករ និងកម្មករប្រមាណជាង១០០០នាក់។

បើតាមប្រជាពលរដ្ឋ កន្លងមកការនាំស្រូវចេញទៅប្រទេសវៀតណាមក្នុង១ថ្ងៃចន្លោះ៥ពាន់តោន ទៅ១ម៉ឺនតោន គឺបានជួយដល់កម្មករខ្មែរដែលបម្រើការនៅបេនកាណូតចំនួនជាង១០០០នាក់​ដោយក្នុងម្នាក់ៗអាចរកចំណូលបានចន្លោះពី៧ម៉ឺនទៅ១សែន៥ម៉ឺនក្នុង១ថ្ងៃ។​

ប្រជាពលរដ្ឋ បន្តទៀតថា កន្លងមកពួកគាត់បានយកសំណើរទៅដាក់នៅតាមមន្ទីរពាក់ព័ន្ធ រួមទាំងសភាពាណិជ្ជកម្មខេត្តស្វាយរៀង និងបន្តទៅសាលាខេត្តស្វាយរៀង ​ ​និងរហូតដល់សម្ដេចប្រមុខរាជរដ្ឋាភិបាលដើម្បីចរចាដោះស្រាយបើកច្រកទ្វារព្រំដែនផ្លូវទឹកប្រឡាយទាហានឡើងវិញ។

ពាក់ព័ន្ធនឹងករណីនេះ មន្ត្រីសាលាខេត្តស្វាយរៀង បានប្រាប់អ្នកសារព័ត៌មាន​ឲ្យដឹងថាបញ្ហាទាំងអស់នេះស្ថាប័នជំនាញបានធ្វើការទំនាក់ទំនងទៅស្ថានកុងស៊ុលកម្ពុជាដែលប្រចាំការនៅទីក្រុងហូជីមិញដើម្បីធ្វើការប្រជុំពិភាក្សាគ្នាដើម្បីដោះស្រាយបញ្ហានេះរួចហើយតែខាងភាគីវៀតណាមនៅពុំទាន់មានចម្លើយមកខាងកម្ពុជាទេរហូតមកដល់ពេលនេះ។

ប្រភពបានបញ្ជាក់ថា វាជាបញ្ហារបស់ភាគីខាងវៀតណាម ដែលគេមិនអនុញ្ញាតឲ្យក្រុមអាជីវករគេ ចូលមកទិញស្រូវពីកម្ពុជា តាមច្រកមួយនេះ មិនមែនខាងកម្ពុជា ជាអ្នកហាមឃាត់នោះទេ។
​
លោក ប៉ាង ឡេង នាយប៉ុស្តិ៍នគរបាលច្រកទ្វារព្រំដែនអន្តរជាតិព្រៃវល្លិ៍ បានប្រាប់ក្រុមអ្នកសារព័ត៌មាន នៅព្រឹកថ្ងៃទី២៨ ខែតុលា ឆ្នាំ២០២៤នេះដែរថាលោកបានទទួលបានព័ត៌មាននេះ​ ដោយលោកបញ្ជាក់ថាមិនមែនខាងខ្មែរ ជាអ្នកបិទនោះទេ គឺខាងភាគីវៀតណាមជាបិទ។

លោកថាកន្លងមកគឺខាងអភិបាលខេត្តស្វាយរៀង និងមន្ត្រីស្ថាប័នពាក់ព័ន្ធបានទៅប្រជុំនៅវៀតណាម ហើយពាក់ព័ន្ធករណីនេះសម្រាប់ព័ត៌មានបន្ថែម អាចសួរទៅខាងសាលាខេត្តស្វាយរៀង៕